Sa soberania catalana e su "no" de sa sinistra

L'OPINIONE - Custa sinistra “ispagnolista” s’est espressada contra a su referendum e a s’indipendèntzia catalana, comente su Psoe e sa setzione sua catalana Psc

In custas dies de referendum catalanu, sos “mèdios” ant faeddadu pagu de sa positzione de sa sinistra ispagnola o, cando nd’ant faeddadu, calicunu s’est ispantadu chi sa sinistra esseret contra a s’autodeterminatzione catalana. A nàrrere sa giusta, custa sinistra “ispagnolista” s’est espressada contra a su referendum e a s’indipendèntzia catalana, comente su Psoe e sa setzione sua catalana Psc. Àteros, comente Podemos o Izquierda Unida, contràrios a s’indipendèntzia, nd’ant fatu una chistione de democràtiza de su votu. Emblemàticu su “manifestu” publicadu su 18 de cabudanni in El País (de sinistra) dae belle milli intelletuales e artistas ispagnolos - e catalanos “ispagnolistas” - chi si definint de sinistra e tratant su referendum comente “trampa antidemocràtica”. Gasi etotu at fatu sa sinistra italiana, contra a cale si siat protzessu de “autodeterminatzione interna” a sos istados europeos. Sa matessi sinistra, però, est semper istada pro sa “autodeterminatzione esterna”, de sos pòpulos “in foras” de s’Europa! O de acordu, in foras de s’Unione Europea, cando s’est tratadu de nch’iscontzare s’Urss (cun s’indipendèntzia de Lituània, Letònia, Estònia), sos istados ex-sotzialistas (cun s’indipendèntzia de s’Islovàchia) o sa Federatzione jugoslava (cun s’indipendèntzia de Islovènia, Croàtzia, Bòsnia e pustis Montenegro e Kossovo dae sa Sèrbia).

Ma, comente mai? Ca, comente amus giai iscritu, b’at “duas” castas de natzionalismu: su de “dòminiu” e, opostu, su de “liberatzione”. Su primu, a su sòlitu rapresentadu dae sa natzione majoritària o prus forte (chi est fata de destra vs sinistra ma sunt aunidas in s’interessu de totu sa natzione), afirmat sos deretos pròpios in intro de s’istadu chi at fraigadu, catzighende o neghende sos matessi deretos a sas natziones inclùdidas in su matessi istadu; su segundu natzionalismu, de “liberatzione”, chi cheret liberare sas natziones assugetadas dae custu domìniu (finas issas, fatas de destra vs sinistra ma aunidas in s’interessu de totu sa natzione), sena negare o catzigare àteras natziones. Pro custu, sa destra de Rajoy e sa sinistra de Sanchez sunt in su matessi fronte destra+sinistra pro defensare sos interessos comunos de sa natzione ispagnola in intro de s’istadu, contra a sas pretesas de liberatzione de sa natzione catalana, basca, galitziana. E, cunforma a su matessi ischema, in funtzione oposta, cadauna de custas natziones est fata de s’unione destra+sinistra in s’interessu de totu sa natzione, contra a su dominadore de s’istadu, sa natzione ispagnola.

Tando, pro sas “chistiones natzionales” internas a sos istados europeos b’at solutziones diferentes: sa rinùntzia (voluntària o fortzada) a sa autodeterminatzione e a sa soberania de cada natzione parte de un’istadu o sa solutzione contrària, indipendentista; in mesu de custos estremos, podimus tènnere s’autonomia (minore o manna), sa federatzione de repùblicas aguales o un’unione formale modellu “commonwealt”. De istados plurinatzionales e federativos “de iure”, b’est sa Cunfederatzione Elvètica. Ma mancu custa solutzione federativa assegurat relatziones paritàrias e elìminat su perìgulu chi una natzione dòminet sas àteras, ca a bias funtzionat su critèriu de “Su dominàriu de sos animales” de G. Orwell, parafrasadu in «totu sas natziones sunt aguales, ma bi nd’at una prus aguale de sas àteras”! E in Isvìtzera sa comunidade “prus aguale de sas àteras” est sa tedesca, subra de sa frantzesa, de s’italiana, de sa romància! Custu ischema podet bàlere pro cale si siat istadu europeu, ca non sunt “istados-natzione” ma “istados-plurinatzionales” de facto, formados dae prus natziones, francu s’Islanda.

Ma sa diferèntzia destra/sinistra in intro de su natzionalismu de
domìniu e destra/sinistra in intro de su natzionalismu de liberatzione abbarrat semper. Pro custu non nos ispantat chi sa sinistra ispagnola siat contra a sa soberania catalana, comente non nos ispantat chi sa sinistra italiana potzat èssere contra a sa soberania de sa Sardigna.



TrovaRistorante

a Sassari Tutti i ristoranti »

Il mio libro

I SEGRETI, LE TECNICHE, GLI STILI

La guida al fumetto di Scuola Comics