Cultura informàtica e giogu sas fainas de sos CoderDojo

Dae sos progetos iscolàsticos a sa Chida europea de sa programmatzione Francesca Mura: «Educamus sos pitzinnos a s’impreu curretu de sa rete»

Orunesu

CUARTU SANT’ALENI. «Pensamus chi a cumprèndere sos limbàgios de programmatzione siat semper prus de importu in su mundu modernu, chi siat prus fàtzile a imparare custas abilidades a minores e chi a nemos diat dèvere èssere negada custa oportunidade. Cada giòvanu dae sos 7 a sos 17 annos si podet aunire e podet pigare parte a unu Dojo de badas. In cue ant a imparare cumpetèntzias comente sas chi bi cherent pro fraigare unu situ web, creare un'aplicatzione o unu giogu e esplorare sa tecnologia in un'ambiente creativu, informale e sotziale». Custos faeddos los agatamus in su situ internet de su movimentu internatzionale nàschidu ses annos a como in Irlanda. CoderDojo, est a nàrrere s’unione de sas paràulas “coder” (programmadore informàticu) e “dojo” (su nùmene giaponesu chi inditat sos logos in ue sos chi pràticant sas artes martziales contivìgiant corpus e mente). In curtzu, sos CoderDojo sunt cuntestos gratùitos de formatzione pro sos pitzinnos e sas pitzinnas chi cherent imparare a programmare gioghende. In Sardigna a bi nd’amus? Emmo. E, pompiende a sa mapa de su situ ufitziale, sunt tres: su de Casteddu; su de Cuartu Sant’Aleni; su de su Guilcier (Abbasanta, Aidumajore, Boroneddu, Ilartzi, Norghiddo, Paulle, Sèdilo, Soddie e Tadasune). Luego, dae su 7 a su 22 de santugaine, b’at a èssere sa “Europe Code Week”, sa chida europea de sa programmatzione. Eventu chi, in Sardigna, pro su de tres annos, at a èssere coordinadu dae Francesca Mura, “champion” de su CoderDojo de Cuartu. «B’amus a pigare parte cun su Tech Fest, su 7, s’8, su 14 e su 15 de santugaine in Casteddu, cun initziativas gratùitas indiritzadas a pitzinnos, babbos e mamas e insegnantes. In custos tres annos apo notadu un’interessu pro sa cultura digitale semper prus mannu». Fainas de gabbale, a dae chi a su presente sunt semper de prus sos piseddos chi manìgiant unu dispositivu multimediale. Trastes chi podent agiuare ma chi cuant finamentas carchi perìgulu. «S’educatzione a s’impreu curretu de internet – sighit Mura – lis permitet de navigare cun seguresa e cun cussèntzia. De custa manera achirint capatzidades noas pro chi devèngiant utentes ativos». Sos CoderDojo movent a totue: su de Cuartu nch’est lòmpidu a Sèneghe, Nùgoro, Thiniscole,
Terranoa. E sas iscolas comente rispondent? «Cun interessu mannu – serrat –. Su giogu est fundamentale ca istìmulat sa fantasia, acreschet s’atentzione e favorit s’imparu». Mura coordinat finamentas su progetu “Codice Rosa” pro nch’acurtziare sas pitzocas a sa programmatzione.

TrovaRistorante

a Sassari Tutti i ristoranti »

Il mio libro

NARRATIVA, POESIA, FUMETTI, SAGGISTICA

Pubblica il tuo libro

Redazione | Scriveteci | Rss/xml | Pubblicità | Privacy

DBInformation SpA. - Sede Legale Viale Giulio Richard 1/a – 20143 Milano - Capitale Sociale Euro 120.000,00 i.v. - R.E.A. Milano n. 1280714 - Registro Imprese di Milano n. 09293820156 - CF e Partita IVA 09293820156.

I diritti delle immagini e dei testi sono riservati. È espressamente vietata la loro riproduzione con qualsiasi mezzo e l'adattamento totale o parziale.