Su questo sito utilizziamo cookie tecnici e, previo tuo consenso, cookie di profilazione, nostri e di terze parti, per proporti pubblicità in linea con le tue preferenze. Se vuoi saperne di più o prestare il consenso solo ad alcuni utilizzi clicca qui

«Bi cherent formas noas pro animare sos giovanos»

Tàtari, sa professora e atora Clara Farina faeddat de iscola e pitzinnos «Istrumentos didàticos modernos, creschet s’interessu pro iscrìere in sardu»

TÀTARI. Clara Farina est professora de iscola superiore e atora de teatru in sardu. Est in cummissione in prèmios literàrios: s’Otieri, su “Seunis” de Tiesi, su “Limba e ammentos” de Ìtiri, su “Gian Piero Cubeddu” de Tàtari. Nàschida in Bulzi, est apassionada manna de limba sarda, chi pràticat semper e in totue. Connoschet bene poetas e iscritores e, duncas, est unu pessonàgiu de importu in su mundu de su sardu, chi nos cunsentit de nde “istudiare” sas tendènzias.

Ite fortza tenet su sardu?

«Est creschende s’interessu de l’imparare in sos giovanos chi no l’ant mai faeddadu, pròpiu como chi est minimende sa connoschèntzia e s’impreu sotziale de sa limba, mescamente in sos pitzinnos. Pro parare fronte a custa “disaura”, bi diat chèrrere sa normalidade de su sardu in iscola e istrumentos didàticos modernos».

E sa calidade de sa limba?

«Sunt in aumentu sos italianismos. Diat tocare chi in chie lu faeddat crescat s’istima pro sos “faeddos sardos” chi sa limba tenet».

Est mègius sa limba de sos iscritores?

«Sa limba de sos iscritores est prus “neta”, frutu de chirca e cunfrontu cun su sardu de cada bidda e sa limba literària. Calicunu, però, paret iscriende a fortza de vocabulàrios!».

E sa literadura in sardu?

«Est creschende, prus in poesia chi no in prosa, chi, semper e cando, est avantzende, in sos ùrtimos annos. Ma, a dolu mannu, mancant sos letores in sardu, galu pagos!».

Pro ite prus poesia chi non prosa?

«Sa poesia est s’arte prus praticada in Sardigna, mescamente in su sèculu coladu. So pessende a Benvenuto Lobina, Frantziscu Masala, Antoninu Mura Ena, Pedru Mura, e àteros medas».

Iscritores giòvanos a nde tenimus?

«Bi nd’at. Ocannu amus premiadu una pitzinna de 15 annos, chi aiat cumintzadu a iscrìere poesia cun sa professora Vanna Ledda, chi dae annos isperimentat su sardu in s’iscola mèdia de Fiolinas».

Ite funtzione tenent sos Prèmios literàrios?

«Sunt istados un’iscola de limba e de iscritura pro sardos medas».

Sos Prèmios a acùrtziant sos giòvanos a sa limba?

«Bi cherent formas noas pro animare sos giovanos a iscrìere in sardu. So pessende a s’esperièntzia poètica noa “Poetry Slam”, chi apassionat giòvanos medas finas in Sardigna».

Ite tempus venidore pro su sardu?

«Longu, ispero! Dipendet dae sos sardos, si cherent sa limba comente motore de su pòpulu chi semus e non si cherent cunfùndere cun sos àteros».

Ite podet fàghere su Guvernu sardu pro sa limba nostra?

«Pro prima cosa una lege de polìtica linguìstica chi pòngiat su sardu ufitziale in cada logu e impreu».