Dae Ollolai a su Livingston jocande su football iscotzesu

Su contu de Raffaele De Vita, babbu calabresu e mama sarda de sa Barbagia «Non mi pariat beru, tenio 15 annos cando so moghidu a un’istadu istràngiu»

OLLOLAI. Raffaele De Vita, romanu, classe 1987, babbu calabresu de Rombiolo, Giovanni, chi a dolumannu oramai non b’est prus, mamma Maria Bussu, sarda de Ollolai. Bi tenet a sas raighinas suas sardas e calabresas, mancari como siat in sos chelos artos de su Football iscotzesu.

Tando, Raffae’, dae su campu de su cuartiere tuo de Roma, su ’e su Villàgiu Breda che s’est paradu in su Blackburn Rovers in 2003?

«Ello, non mi pariat beru, tenio 15 annos, aio bidu campos de terra e como m’agataio in campos gai prefetos chi pariant fintos, cugugiados, cun piscinas, palestras: unu bisu, unu paradisu pro mene. E m’ant tratadu deretu bene e unu cuntratu pro 4 annos».

E mama e babu tuos?

«Pensadilu, terroritzados! Galu non cumprendo su coràgiu chi ant tentu de mi lassare mòghere a 15 annos, e a un’istadu istràngiu!».

E ite as fatu in s’isport?

«Totu sas isfidas de sas iscuadras de sos giòvanos finas a sa segunda categoria cun giogadores de su càlibru mannu meda comente a Roque Santa Cruz, Benny McCartthy, Craig Bellamy. Una esperièntzia istraordinària e in cue m’apo criadu sa carriera in su Regnu Unidu. Su Football inglesu ti dat prus sicuresa, rispetu a s’italianu, sas sotziedades sunt prus istabiles».

Cal’est esperièntzia chi t’ammentas de pius?

«S’atopu cun s’allenadore Di Canio. In su Swindon Town su mègius atòbiu est istadu a agatare s’ìdolu meu de semper, dae cando fipo minoreddu: s’allenadore Di Canio, chi m’at fatu crèschere giogande l’Fa Cup e sa Carling Cup contr’a iscuadras blasonadas cumente a s’Aston Villa, su Laicester City, su Wigan, su Stoke City. Si est a faeddare de Di Canio poto iscrìere unu libru».

E de s’esperientzia in Iscotzia ite mi naras?

«Bella aberu cun sa Ross County, sa sotziedade in su nord de Inverness, unu logu surreale, battor oras de auto dae Glasgow, prenu de parcos, nive, sos chervos chi passìgiant in s’istrada, panoramas de una bellesa favolosa in sa zona de su lagu incantadu de Lochness. Arribo e s’iscuadra fiat in fundu a sa classifica e deretu l’apo fata bìnchere signande unu de sos mègius gol de sa carriera mea. A pustis amus bintu 8-9 partidas e in su primu mese chi soe arribadu apo otènniu su prèmiu comente su mègius giogadore de Spl, prèmiu chi no aiat bintu mai nessunu àteru giogadore de sa Ross County. Pru cussu poto nàrrere chi sa prima istagione est istada pro mene aberu màgica».

Oe jocas in su Livingston, serente a Edimburgo?

«Eja,
e m’intendo responsabile meda ca soe de sos antzianos e depo agiudare s’iscuadra a crèschere fortzis de categoria, dae B in A, e cussìgio a sos giòvanos de giogare cun amore, cun passione, ca gai su càlcio lis donat emotziones ùnicas» tancat Raffaele De Vita.



TrovaRistorante

a Sassari Tutti i ristoranti »

Il mio libro

NARRATIVA, POESIA, FUMETTI, SAGGISTICA

Pubblica il tuo libro