Isthori vibiddi 

“Lu prinzipinu”, un libru chi fabiddaba in sassaresu

Traduziddu da Antoneddu Bazzu e Mariu Marras: li manni no cumprèndini mai nudda...

Una vostha, candu abia sei anni, in un libru chi fabiddaba di la forestha ancora ìnnidda, intituraddu “Isthori vibiddi”, videsi un disegnu isthrausdhinàriu. V’era rapprisintaddu un saipenti boa inguddèndisi un animari. E accolla la cópia di lu disegnu.

V’era ischrittu: «Li saipenti boa s’ingòddini l’animari tutti intrei, chena masthiggalli. Dabboi no ridéscini più a immubissi e si n’isthàzzini drummiddi pa’ tutti li sei mesi chi dura la digisthioni». Pinsesi a longu tandu a lu chi suzzedi i’ la forestha e cun una làpisi cururadda, m’arrischesi eu puru a impriasthà lu primmu disegnu. Lu me’ disegnu nùmmaru 1 era digussì:

Fesi vidé la me’ óbara d’asthi a li manni priguntendi si lu disegnu l’assusthaba.

– E pagosa zi dubarìsthia fà assusthà un sumbreri? – m’abìani riposu. Ma lu me’ disegnu no rapprisintaba un sumbreri, rapprisintaba un saipenti boa digirendi un erefanti.

Tandu disignesi la pasthi indrentru di lu boa, pa’ fà in modu chi l’abùssiani cumpresu. A li manni bisogna sempri ipiagalli tuttu. Lu me’ disegnu nùmmaru 2 era cument’e chisthu:

Li manni mi cunsigliésini di lassà a pisdhì li disegni di li saipenti boa, sia a pasthi indrentru chi a pasthi di fóra e di punimmi a isthudià invecci la giografia, l’isthória, l’aritimétigga e la grammàtigga. E dunca, a sei anni, daghesi a pisdhì chissa chi pudia assé la me’ fusthuna cument’e pintori. La mara ridiscidda di li me’ disegni 1 e 2 m’abia disanimaddu. Li manni, da par eddi, no cumprèndini mai nudda e pa’ li pizzinni è una cundenna dubé dà sempri ipiagazioni pa’ dugna cosa. Mi tucchesi, tandu, d’isciubarà un’asthra facusthai e imparesi a guidà l’aeroprani. Àggiu buraddu un poggu pa’ tuttu lu mondu. E tandu la giografia m’è sivvidda avveru. Soggu cunniscì a primmu còipu d’occi la Cina da l’Arizona.

Ed è un aggiuddu mannu si la notti unu si pesdhi.

In vidda mea àggiu cunnisciddu un muntoni di genti impusthanti e àggiu vibiddu a longu cu’ li manni.

L’àggiu cunnisciddi be’, osseivèndiri da vizinu. Ma tuttu chisthu no ha migliuraddu assai lu chi pinsaba d’eddi. Candu attuppaba unu chi mi paria un poggu più isciddaddu di l’asthri, tintaba l’ipirimentu di lu me’ disegnu nùmmaru 1, chi arribbu sempri.

Zischaba di sabé si si trattaba d’una passona chi cumprindìssia caschecosa. Ma dugna vostha, ommu o fèmmina chi fùssia, mi ripundia: “E no è un sumbreri!” Allora
eu ni la sinsaba di fabiddà di saipenti boa, di foresthi ancora ìnniddi e d’isthelli, m’abbasciaba a lu so’ libellu, fabiddendi di bridge, di golf, di purìtigga e di cuibatti. E chissa passona manna era cuntenta assai d’abé cunnisciddu un ommu cumenti si tocca...

©PAPIROS 2018

TrovaRistorante

a Sassari Tutti i ristoranti »

Il mio libro

NARRATIVA, POESIA, FUMETTI, SAGGISTICA

Pubblica il tuo libro