Sos sentidos de Sardigna in sos iscatos de Pablo Volta
de Lisandru Beccu
Silanos, s’eventu Nois at cròmpidu tres annos e sighit a pompiare a tesu Sos pannellos fotogràficos sunt torra protagonistas in sas carreras de sa bidda
05 agosto 2018
2 MINUTI DI LETTURA
SILANOS. Sos pannellos fotogràficos sunt torra protagonistas in sas carreras de Silanos. S’eventu Nois, chi at mòvidu sos primos passos in su 2016, at cròmpidu tres annos e sighit a pompiare a tesu. S’editzione de ocannu at otènnidu torra su contributu de sa Fondazione di Sardegna e sa collaboratzione noa cun s’Isre. S’inauguratzione l’at aberta “SilanusLithos”, dae s’8 a su 29 de làmpadas. Su tema pertocaiat un’espositzione de fotografias a incuru de Frantziscu Marcheschi e de Sarvadore Falchi chi at bogadu a campu sas prendas archeològicas de su sartu silanesu. Sa domo de su magiore (Casa Aielli), dae su 9 de trìulas a su 24 de austu, est sede fintzas de duas mustras de importu. “La Sardegna del secondo 900 raccontata dal fotografo Pablo Volta” rapresentat s’atrativa printzipale. In sos iscatos de su fotògrafu argentinu bi sunt totu sos sentidos de una Sardigna presa ancora a sos valores autènticos e a sas traditziones. Sas imàgines, tiradas in sos annos chimbanta, illustrant Orgòsolo, Nùgoro, Dèsulu, Làconi, s’Ogiastra e unos cantos momentos de su carrasegare mamujadinu. In sa banda dinàmica de su museu, imbetzes, sos operadores ant aprontadu unu percursu intituladu “Silanus dagli anni ’50 verso la modernità”. Una caminera dinàmico-multimediale chi traessat s’istòria de Silanos e descriet s’isvilupu econòmicu e industriale de sa bidda. Dae su tzìrculu culturale a su primu telèfonu, finas a nch’arribare a sa fàbrica de gassosa e a sa cava de sa carchina. Totu est acumpangiadu dae sas didascalias chi descrient su traballu e sa vida sotziale de chimbanta annos a oe. Sa Comuna, dae ocannu, at crèschidu s’oferta turìstica aberende a su pùblicu sa crèsia de Santa Rughe chi costoit un’altare de linna decoradu de su de XVIII sèculos. In intro sunt espostos sos pannellos cun sas riprodutziones de pagu prus o mancu 50 bestires traditzionales de sas biddas sardas. S’intrada est lìbera pro totus e sos oràrios de vìsita, pro ambas sas mustras, sunt dae sas 10 a sas 13 e dae sas 17 a sas 20, dae su lunis a su sàbadu. Pro custa editzione non podiat mancare nemmancu su cuncursu fotogràficu “Genius Loci”, chi s’annu coladu est resèssidu bene e chi punnat a promòvere sas prendas istòricas, culturales e umanas de sa comunidade silanesa. Su regulamentu est a disponimentu in su situ internet de sa Comuna de Silanos.
