Un’aplicatzione pro sas màscaras
de Lutzianu Piras
Mamujada, traditziones populares e innovatziones in su museu de pratza de Europa
30 aprile 2017
3 MINUTI DI LETTURA
IMBIADU A MAMUJADA. Sas màscaras prus antigas de Sardigna a un’ala; sa tecnologia prus reghente a s’àtera. Cara a cara su betzu cun su nou, inoghe in su Museu de sas caratzas mediterràneas, in intro e in foras de sos locales de pratza de Europa, subra de sa Sala cunsiliare. Ca si est beru chi bi sunt sa màscaras nieddas trìghinas de sos Mamuthones, sas “viseras” in mamujadinu, beru est chi b’at fìntzas una multi-visione in italianu e tedescu e un’aplicatzione fata aposta pro sos chi benint a bisitare custu logu.
Un’aplicatzione pro sos turistas, mannos e minores, un’àudio-ghia chi funtzionat cun s’Ipod; in antis petzi in frantzesu e como fìntzas in inglesu e in tedescu, ca sunt semper de prus sos istràngios chi cherent bìdere sas màscaras de Mamujada, de Otzana, de Oroteddi e de sas àteras biddas.
«Su 40 pro chentu de sa gente chi benit a inoghe est de aterue. S’annu coladu amus àpidu 22mìgia billetes de intrada» narat Màriu Paffi, mamujadinu de su ’70, laureadu in Tàtari in Sièntzias polìticas, presidente de sa cooperativa Viseras chi non gestit su Museu de sas caratzas mediterràneas ebbia (abertu in su mese de santandria de su 2001), ma finas su Museu de sa cultura e de su traballu (abertu in su 2011) e su Mater, su Museu de s’archeologia e de su territòriu (abertu in su 2014). MaMu, si narat su sistema museale, e cheret nàrrere MamujadaMuseos. E no est de badas si inoghe, in custu logu de antighidades e traditziones populares, ant ammaniadu un’àtera aplicatzione dinàmica pro dispositivos Android e iOS: “Mamoiada4You” est fata pro pòdere bisitare sos museos, sa bidda e totu sa zona cunforma a su logu de cada pessone chi colat in Mamujada e cunforma a sos interessos chi tenet: cultura, archeologia, enogastronomia. S’aplicatzione “Mamoiada4You” l’at fata sa dita Lynx Srl de Casteddu e si podet iscarrigare in donu dae s’App store, sa butega de sas aplicatziones de sa Apple, e dae Google play store.
«In custa manera cherimus sighire a traballare cun totu sa comunidade nostra e cun totu sos benes chi b’amus in zona», narat Giuanne Luisi Paffi, frade carrale de Màriu, duos annos prus mannu de issu, laureadu in Tàtari in Sièntzias naturales. Giuanne Luisi est fìntzas una ghia escursionìstica. «Est bastante a bìdere su chi amus fatu in custos annos cun su Museu Nivola de Orane, cun s’Acuàriu de Gonone, cun Donnortei de Fonne o cun sos cumpàngios de Orgòsolo», annanghet. «Como semus ammaniende finas sa multi-visione pro sos pitzinneddos» narat Rita Mele, issa puru de sa cooperativa Viseras, mamujadina de su ’76, laureada in Tàtari in Limbas e literaduras istràngias, referente de sos servìtzios didàticos de MaMu. «Pro sos pitzinnos e sas famìlias tenimus pachetes prontos. Sos laboratòrios chi faghimus pro sos minores sunt semper de prus. In su 2016 amus contadu a su nessi milli pitzinneddos, una bintina de iscolas de totu sa Sardigna». “Una die in Barbàgia” pro fàghere e iscontzare in sos tres museos de Mamujada, pro gustare, bìdere sos Mamuthones e sos Issocadores e sas butegas de sos mastros de bidda, e fàghere fìntzas unu giru in intro de Orgòsolo.
