La Nuova Sardegna

OTIERI. Una ia ancora Otieri, si puru bind’aiat bisonzu, si est presentada comente mama de sa cultura e pius in piusu de sa limba sarda. S’occajone est istada su bell’abboju chi s’est tentu in sa grasciosa, istorica piata de Santu Franziscu, in Cuzzolu, pro meritu de sa cantadora e animadora culturale Luisella Pittalis, sempre addainanti in bidda cando c’at de faghere cosas de profetu. At giamadu, in mesu a ateros bonos musicistas locales, sas artistas nodidas non solu in Sardigna Claudia Crabuzza e Claudia Aru chi ant cantadu e dialogadu cun su prubicu in festha, mai cantu numerosu e attentu finas a s’ultimu. Ant cantadu in melodiosa limba aligheresa-catalana sa prima e in ispiritosa e sonante limba campidanese s’atera. Ad’abeltu sas serenadas Luisella cun d’unu sentidu ammentu de sa dulche poetessa Mirella Mela. At presentadu una bella cantone in logudoresu, dedichendela a sas feminas e a su tribagliu insoro de impostu mannu in familia e in sa comunidade.

Sunu gai intradas cun manu sigura ma puru cun delicadesa e ripetosa dignidade in su caminu largu abertu in Logudoro dai tempus da iscritores e poetas comente Toninu ‘Eledda (criadore de su Premiu Otieri de literadura sarda), dai sos mastros de sa poesia a bolu: Morittu, Cubeddu, Pirastru, dae Maria Rosa Punzirudu e Maria Teresa Cau e dai sos milli e milli cuncurrentes chi pro 57 annos ant partecipadu a su Premiu Otieri e a sos ateros frades suos in d’onzi leada de s’amada isula nostra, mascios e feminas (tottu de gabbu mannu).

Non b’at apidu bisonzu de sa Limba sarda comuna, ca sa zente at mustradu de cumprendere e apreziare (o a su mancu gai est parfidu) onzi paraula e cuncordu musicale. Zeltu sa pius aggradessida est istada sa limba logudoresa ma finas sas ateras faeddadas sunt piachidas. Custu pro narrer chi onzunu devet essere liberu de impreare su limbazu de sa ‘idda sua chi devet essere valorizzadu sempre pius, lassende poi a sas “autoridades” sa possibilidade de impreare in sos documentos ufiziales sa Lsc. Est poi de signalare ch’in piatta est istadu nadu dai meda zente chi in cust’impreu unu bonu, inteligente aggiudu l’est dende dai calchi mese sa “Nuova Sardegna” chi at fatu logu in sas paginas de mesu a sa limba e a sa cultura sarda. Custu est su caminu giustu de sighire e si est possibile de infolzire. Grazias tando a su direttore Andrea Filippi e a totu sos chi l’inghiriana ga an gai bene mantesu sa promissa fatta una joba ‘e meses faghede a sos collaboradores e curripondentes de sa “Nuova” chi in d’unu abboju in Tatari aiant pedidu pius ipaziu pro sa limba.