La Nuova Sardegna

SILANOS. Espositziones, mustras e cuncursos fotogràficos dae su 14 de trìulas fintzas a totu su mese de santugaine. Su progetu ambitziosu de sa comuna de Silanos punnat a s’arte fotogràfica pro valorizare e pro promòvere su territòriu suo. Su progetu “Nois” aberit sas ghennas de sa bidda a su mundu e torrat a iscobèrrere istòria, valores e traditziones antigas cun sas imàgines de unos cantos fotògrafos amatoriales. Sos pannellos in biancu e nieddu sunt giai collocados peri totu sa carrera printzipale e, tràmite sas fotografias tiradas dae sos annos sessanta in susu, descrient contos e paristòrias de sos logos chi rapresentant. Fintzas sos privados e sas atividades cummertziales ant aderidu a s’eventu e ant acollidu, in sos aposentos issoro, sas fotografias prus particulares.

“Nois” est promòvidu dae s’amministratzione comunale de Silanos, in collaboratzione cun sa Pro loco, cun su Crs4, cun s’assòtziu Borghi autentici e cun sos operadores de Silanus comunità ospitale. Su contributu est de sa Fondazione di Sardegna e su patrotzìniu de sa Càmera de cummèrtziu de Nùgoro. Un’initziativa nàschida fintzas gràtzias a s’idea de Frantziscu Marcheschi chi est su coordinadore e s’autore de sa majoria de sas fotografias in espositzione. Su percursu fotogràficu movet dae sos muristenes de su situ archeològicu de Santa Sarbana, finas a si nche ghetare a intro de sa bidda, in sas butegas, in su cursu e in sa Domo de su Majore Aielli, logu istòricu ue sos operadores ant ammaniadu una mustra intitulada “Marine & marine di Sardegna”, cun sas pinturas de Càralu Nieddu Arrica e cun sas fotografias de Marcheschi. Sas òperas s’ant a pòdere ammirare finas a su bator de austu, su mangianu dae sas deghe a sa una e su sero dae sas tres e mesa a sas sete e mesa. Dae pagas dies est ativu fintzas su cuncursu fotogràficu “Genius Loci” chi at a premiare sas fotografias prus rapresentativas, prus galanas e chi ant a espressare mègius s’identidade de sa bidda de Silanos. Sos primos tres classificados s’ant a pigare, in secuèntzia, 700, 300 e 200 èuros.

Pro leare parte a su cuncursu b’at tempus finas a su tres de cabudanni de ocannu. Semper in sa Domo de su Majore Aielli, dae s’oto de austu a su trinta de cabudanni, ant a èssere espostas sas fotografias de Luisi Corda, fotògrafu lìberu professionista nàschidu in Casteddu. Sa mustra, “100 centenarians, the good way of life”, est dedicada a sos chentenàrios de Sardigna e ponet in evidèntzia, cun ripresas in primu pranu, s’espressividade manna e funguda de sas caras.