La Nuova Sardegna

MONTRÉAL. Sa Sardinnia est manilarga cun isos emigrados suos, et s’impellériu de cada presidente de Regione de poner manu a custu capítulu de s’aministratzione regionale est cosa mala a cumbatare. Francu pro Renato Soru, qui ordingeit una cunferéntzia de emigrados in isos últimos meses, totu isos áteros presidentes ant afrontadu sa quistione dae s’inghitzu. Christian Solinas, a cantu paret, bolet esser recordadu que presidente anquilestru. Umpare a s’assessora Alessandra Zedda at presentadu in Casteddu unu progetu tituladu a s’italiana “Casa Sardegna” qui punnat a su “mantenimento del forte legame identitario” intr’e isos sardos emigrados pro more, intr’e áteros, de s’elementu simbólicu de su nuraghe: chentuvintunu nuraghes “in scala” in cadaunu de isos círculos sardos in su mundu. Duncas, a ddis amentare sa Sardinnia a isos cunnatzionales sardos no at a esser sa limba issoro, nei su cantu a tenore, nei isas batorinas de isos poetas, ma unu muntone de pedras angenas fraigadas in fromma de pischedda a fracas in susu. Mancu si schit ad ite fiant isos nuraghes, pero giai si schit qui pro isos sardos “nuraghe fa casa”, apparis de isas piramides pro isos egitzianos, de isos igloos pro isos inuit, e de isas rasagnole Barilla pro isos italianos. Su paternalismu folkloricu de un’operatzione que pare no est cosa noa pro gente impinniada dae ora meda in s’emigratzione que a nois. A paraulas nos tratant de “ambasciatori” o “missionari” (a bisu de s’assessora), a veras semus gente bona pro imperare a stumbadura pro rejones politicas internas de bidda. Que eletores semus unas pàrigas de migias, paga cosa, e votamus unu pagu a sa sconcada, pero su patriotismu nostàlgicu adattadu a sa neo-limba de consulente de marketing “vincente”, cussu ecoghi de votos cussorgiales sardos giai nde trazat semper. Stimados politicos e funtzionarios regionales, bos queria narrer qui no est de títulos onoríficos qui tenent bisongiu isos sardos peri su mundu, nei de promissas de nos faher torrare a domo a bos votare. Sa domo belleggai giai dda tenemus. S’identidade nostra no est unu nuraghe de unu metru e mesu in s’ortu afacas a sa latuca. Est sa limba, sa curtura e su disigiu, ancus siet dae atesu, qui sa Sardinnia podat afortiare e isos sardos podant crèscher e abboniare. Incumintzet sa Regione a prantare árbures, illimpiare s’incuinamentu e lassare abèrtos e atzessivos cada die de s’annu isos nuraghes berdaderos qui s’agatant a mígias subra sa terra de su pópulu qui ddos at fraigados.