La Nuova Sardegna

Serenella Porcu, ragioniera de chimbanta chimbe annos, figiada, cun unu risu durche nos faghet connòschere impinnos e sentidos de un’atividade eredada dae su babbu, una famìlia nàschida cun s’iscatu fotogràficu in s’ànima.

Cun ogros lùghidos miras una màzine a tintas arbas e nieddas, conta·nos, dae cantu tempus traballas cun sas fotografias?

«Dae trinta annos comente mere de s’istùdiu. Ma deo apo incumentzadu a traballare dae sos trèighi annos paris cun babbu meu finas si andaia a iscola. Isse, chi como est mannu e giubiladu, m’at trasmìtidu custa passione chi tèngio semper in coro».

A fàghere custu traballu, a sa sola ses o nono?

«Traballo cun frade meu, Carlo. Isse mescamente si ocupat de iscatare sas fotografias e tenet finas cursos teòricos e pràticos de custa materia».

E sos cursos chi tenides, pro chie sunt?

«Sos cursos nostros sunt abertos a totus sos chi cherent connòschere su mundu de sa fotografia. Sunt meda a beru sos fotografos de Sardinna chi si sunt ispetzialigiados pro custu traballu in s’istùdiu nostru».

Istràngios dae in foras mai nd’ais àpidu?

«Eja, inoghe amus àpidu cumbidados de àrchidu, pessones chi traballant in su mundu de sa fotografia a livellu artu meda. Custu annanghet calidade a sos cursos chi tenimus. Non potzo ismentigare chi amus cumbidadu finas Steve McCurry, fotografu de s’America famadu in totu su mundu».

Pro custa atividade cales istrumentos serbint?

«Prus de totu sa màchina fotogràfica, su computer e s’imprentadora».

De fàghere carchi cosa diversa dae su de avesu, a t’est capitadu?

«Una borta una giòvana si deviat cojuare e aiat sa parentella in foras dae sa Sardinna. Tando deo, l’apo finas acumpangiada a si seberare su bestire».

A sos clientes ite oferta lis dais?

«Nois faghimus servìtzios fotogràficos de cale si siat forma. Dae s’imprenta de sa fotografia pro sos documentos a sos servìtzios pro afidos, sos batiares, comuniones, crìsimos e cada eventu chi siat de importu mannu pro sa gente chi disìgiat de firmare su tempus».

Oe in die cun sa tecnologia totus si bestint de fotografu e pagos lu sunt, ite nde pensas?

«Unu tempus sa professione nostra aiat unu reconnoschimentu chi oe s’est pèrdidu o podimus nàrrere trasformadu pro s’adatare a sas mudas de sos tempos e de sos disìgios de sa gente. In antis, si una pessone cheriat àere una fotografia, pro la fàghere e pro l’imprentare, aiat bisòngiu de su fotografu professionista. Cun sa lòmpida de su digitale totus ant sa possibilidade de fàghere fotografias, chèrgio nàrrere si oe cheres bìdere sos iscatos chi as fatu lu podes fàghere deretu dae domo tua, mirende·los in su telefoneddu o in su computer o in intro de sos social. Su balore de cudda màzine antiga, chi s’ingrogat pro su tempus chi colat, lu semus perdende a beru».

In su traballu de cada die, su digitale, mudas de importu at batidu?

«Penso a sa “camera oscura” e a sa chìmica pro sas imprentas chi non s’impreant prus, francu si b’at calicunu galu amantiosu de sa machina fotogràfica cun su rullinu».

Servìtziu fotogràficu pro afidos, a nos contas comente si faghet?

«Cando amus unu servìtziu de afidu nos nche colamus tota sa die paris cun sos isposos. Los sighimus cando si sunt bestende, cando afidant in crèsia e a su cùmbidu. Semus acanta a issos pro nde coglire cuddos momentos ispetzìficos chi devent èssere frimmados cun s’iscatu».

Tue e frade tuo, ais ambos unu fìgiu, issos sunt amantiosos de sa fotografia?

«Eja finas issos a bellu a bellu si sunt acurtziende a custu traballu».

Ite pensas pro su tempus benidore?

«Su mundu de sa fotografia finas si at connotu tempos de mudas fungudas no at a mòrrere mai, ca oe si bivet de màzines chi sunt in totue. Est mudada – cùngiat Serenella Porcu – sa cultura e sos professionistas devent èssere semper prus ispetzialigiados pro respùndere a sas esigèntzias de sa gente».