Su càntigu a tenore curret a caddu de Fb e de Youtube
de Lutzianu Piras
Ollollai, su Sòtziu Sardigna: baranta e passa grupos aunidos in pare «Nche semus in intro de sa modernidade cun totu sas àteras mùsicas»
28 maggio 2017
2 MINUTI DI LETTURA
OLLOLLAI. Dae sas biddas nostras a su mundu intreu. E non petzi ca bator giaponesos o bator americanos si pesant a boghe de ballu, nono... Est a nàrrere, prus a prestu: su càntigu a tenore, oe chi est oe, biàgiat in totu su mundu gràtzias a internet e a sas retes sotziales mescamente, Facebook est sa prus connota ma finamentas Youtube. «Càntigu, limba, innovatzione e didàtica» narat Antiocu Bussu, de Ollollai, presidente de su Sòtziu Tenores Sardigna. «Nche semus in intro de sa modernidade cun totu sas àteras mùsicas de su mundu, nudda de prus e nudda de mancu», annanghet Bustianu Pilosu, etnomusicòlogu de Torpè, segretàriu de su matessi Sòtziu, baranta e passa grupos aunidos in pare.
«Dae cando semus essidos, in su 2007, amus deretu fatu fàghere unu situ internet» sighit Pilosu. L’at fatu s’isvilupadore thiniscolesu Fàbiu Coronas, de Thanitart: www.tenores.org. «In su situ b’at unu muntone de materiale, àudio e vìdeo, in sardu e in italianu. Como lu semus agiornende, ma tenimus milli impignos e bi cheret tempus e logu». Prus lestros sunt Facebook e Youtube. Su Sòtziu at duncas disinnadu de abèrrere fintzas una pàgina Fb e unu canale Yt, ambos si narant Sòtziu Tenores Sardigna. In intro b’at de totu. Totu sas biddas sardas e totu sas boghes de Sardigna. E si Deus cheret luego b’at a èssere fintzas s’ispetàculu a tenore fatu in su teatru Eliseo de Nùgoro in su 2016, regia de Antoni Cadoni, in ammentu de Armando Pira, “Non canto pro dinare ma pro gustu”.
«Dae s’annu coladu semus collaborende fintzas cun su progetu europeu i-Treasures (www.i-treasures.eu) – acrarit Bustianu Pilosu –, unu progetu pro sos benes tutelados dae s’Unesco, comente est su càntigu a tenore». B’est puru su Cnr de Gènova in custu traballu de tecnologias noas. Su Sòtziu est dende una manu cun sas proas, sa chirca e sa mètrica. S’idea est de fàghere unu sistema didàticu interativu cun letziones de cantu online e de resèssere a fàghere “cantare” fintzas s’elaboradore comente, a oe, acontesset cun aplicatziones che a “google translate”.
Sos presidentes. Custos sos presidentes chi ant ghiadu su Sòtziu Tenores in custos annos: Tanielle Cossellu, tenore Remunnu ’e Locu, de Bitzi (est istadu su primu); Bustianu Pilosu, tenore Cùcuru ’e Luna, de Torpè; Pipinu Cidda, tenore S’Arvorinu, de Orune; Tore Ghisu, tenore Santu Frantziscu, de Alà; Franco Davoli, tenore Supramonte, de Orgòsolo; Antiocu Bussu, tenore Ospitone, de Ollollai.
«Dae cando semus essidos, in su 2007, amus deretu fatu fàghere unu situ internet» sighit Pilosu. L’at fatu s’isvilupadore thiniscolesu Fàbiu Coronas, de Thanitart: www.tenores.org. «In su situ b’at unu muntone de materiale, àudio e vìdeo, in sardu e in italianu. Como lu semus agiornende, ma tenimus milli impignos e bi cheret tempus e logu». Prus lestros sunt Facebook e Youtube. Su Sòtziu at duncas disinnadu de abèrrere fintzas una pàgina Fb e unu canale Yt, ambos si narant Sòtziu Tenores Sardigna. In intro b’at de totu. Totu sas biddas sardas e totu sas boghes de Sardigna. E si Deus cheret luego b’at a èssere fintzas s’ispetàculu a tenore fatu in su teatru Eliseo de Nùgoro in su 2016, regia de Antoni Cadoni, in ammentu de Armando Pira, “Non canto pro dinare ma pro gustu”.
«Dae s’annu coladu semus collaborende fintzas cun su progetu europeu i-Treasures (www.i-treasures.eu) – acrarit Bustianu Pilosu –, unu progetu pro sos benes tutelados dae s’Unesco, comente est su càntigu a tenore». B’est puru su Cnr de Gènova in custu traballu de tecnologias noas. Su Sòtziu est dende una manu cun sas proas, sa chirca e sa mètrica. S’idea est de fàghere unu sistema didàticu interativu cun letziones de cantu online e de resèssere a fàghere “cantare” fintzas s’elaboradore comente, a oe, acontesset cun aplicatziones che a “google translate”.
Sos presidentes. Custos sos presidentes chi ant ghiadu su Sòtziu Tenores in custos annos: Tanielle Cossellu, tenore Remunnu ’e Locu, de Bitzi (est istadu su primu); Bustianu Pilosu, tenore Cùcuru ’e Luna, de Torpè; Pipinu Cidda, tenore S’Arvorinu, de Orune; Tore Ghisu, tenore Santu Frantziscu, de Alà; Franco Davoli, tenore Supramonte, de Orgòsolo; Antiocu Bussu, tenore Ospitone, de Ollollai.
