La Nuova Sardegna

DURGALI. Sa ruga est una tzirpia chi sas dies primàrgias de su mese de làmpadas at atacadu a sos padentes gràtzias a sa sicagna. Sunt giai medas etaras de matas in su padente chi arrumbant sena fògias e cumparent cun sas carvas isfogiadas. Paret b’apat coladu fogu. Esistit un’erribiu chi in sardu si narat caneruga su Calosoma sycophanta chi est in gradu de la cuntrastare. Medas si domandant si custas matas corfadas si potzant aviare ca como sunt sena fògias. Sa ruga s’at a tramudare in una crisalide, de pustis in una leporedda, e in su mese de triulas sas matas diant depere bogare sas fògias noas prus pitzocas de su normale, ma istrossadas ònnia annu non diant aguantare.

In antis sa Provìntzia aiat sos fundos e aiat fatu fintzas campagnas impreende elicòteros a pesone ispainende dae s’àera unu produtu non chìmicu, una bateria, chi fiat produidu in Israele est a narrere su Bacillus turingensis. Cando sas Provìntzias sunt istadas burradas in freàrgiu de su duamìgia e sèighi sa cumpetèntzia est de sa Regione. Tzertu ca oe si diat depere averguare sa possibilidade de faghere acòrdios cun sas universidades sardas pro iscòpios issientìficos mirende a impreare non prus elicòteros ma drones cun disterras pitzocas pro ispainare su produtu. Un’àteru sistema si podet impreare cando sas leporeddas ant a deposare sos oos. Pro nche los ghetare si diant podere impreare bruchistrillias cun mànigas longas. Custu sistema est istadu giai impreadu dae sa Provìntzia de Nuoro in su duamigia. Sos sistemas pro chi custa ruga non si torret a presentare in sos annos imbenientes sunt o a la morrere cando est berme o a nche isperdere sos oos cun sos numenados metodos mecanicos. Pro su restu sas Provìntzias ricostituidas diant depere pedire recursos a sa Regione pro poderent cuntrastare a custa pesta de sos àrbores. Difatis su dannu econòmicu est non solu pro sos territòrios turìsticos ma fintzas pro cussos de s’internu cando sa ruga atacat a su suèrgiu e faghet fartare a su produtu comertziale, est a narrere su cortighe. Sa recurrente sicagna in istiu at a peorare meda in sos annos imbenientes a sa situatzione e non faghet a s’agatare disabudos.