Finantziamentos a su pastoriu ma sos problemas abarrant
de Banne Sio (*)
Pro essire dae sa crisi cheret a fàghere pro prima cosa providimentos craros Oe no ischimus cantu late murghent in Sardigna nen cantu est fatu a casu
2 MINUTI DI LETTURA
ORGÒSOLO. Su pastoriu in Sardigna rapresentat una chistione no econòmica ebbia ma finas sotziale de importu mannu. B’at prus de tres milliones de berbeghes e si murghent prus de treghentos milliones de litros de late a s’annu.
Costos de produtzione chi aumentant semper de prus e preju de su late semper prus bassu cunditzionant s’economia e sa vida de su pastore.
Sa lege de su 12 de cabudanni n. 20 de sa Regione sarda previdet dinare meda pro su pastoriu. Non podimus no èssere de acordu cun su Cussìgu regionale ma custa lege, che a totu sos interventos chi non sunt istruturales, est unu rimèdiu chi parat fronte a s’emergèntzia ma no a sos problemas de su pastore e, mascamente, no evitat chi sa matessi situatzione si torret a presentare s’annu imbenente.
Pro essire dae sa crisi cheret a fàghere pro prima cosa providimentos, chi de su restu non costant nudda, chi punnent a sa craresa e a àere datos produtivos seguros. Oe no ischimus cantu late murghent in Sardigna nen cantu de custu late est fatu a casu. No ischimus ite gastas de casu faghent, ne in ue est bèndidu e a cale preju. Non benit bene a programare unu setore sena ischire custu.
S’ùrtima lege regionale, mentovada in antis, previdet chi, si su pastore cheret pigare su finantziamentu, depet decrarare su tantu de bestiàmene chi tenet e su late chi versat in caseifìtziu.
Est unu primu passu. Ma tocat de sighire in custa àndala e tando cheret a:
- impònnere a sos caseifìtzios chi retzint dinare pùblicu de comunicare sos datos produtivos e cumertziales;
- pretèndere chi su Ministèriu de s’Agricultura emanet su decretu atuativu de s’art. 151 de su Regulamentu (Ue) n. 1308/2013, chi òbrigat sos caseifìtzios a comunicare mese cun mese su tantu de su late chi còmporant. Custa règula in Itàlia b’est giai pro su late bàchinu e in Frantza e Ispagna finas pro su late berbeghinu;
- dare dinare pùblicu petzi a sos caseifìtzios chi rispetant sas cuotas de produtzione de su Casu romanu istabilidas dae su programa de autoregulamentatzione de su Cunsòrtziu de tutela, ca est sa produtzione in prus de Casu romanu chi at causadu sa crisi. Su 23 de martzu de ocannu su presidente de su Cunsòrtziu at naradu chi 8 sòtzios ebbia, subra de 40, aiant leadu parte a su programa de autoregulamentatzione produtiva.
B’at de s’augurare chi oe siant de prus, si nono est craru chi b’at argunos chi dae custa crisi non bi cherent essire, antis la cherent mantènnere pro cumbèniu issoro.
(*) Confagricoltura Sardigna
Costos de produtzione chi aumentant semper de prus e preju de su late semper prus bassu cunditzionant s’economia e sa vida de su pastore.
Sa lege de su 12 de cabudanni n. 20 de sa Regione sarda previdet dinare meda pro su pastoriu. Non podimus no èssere de acordu cun su Cussìgu regionale ma custa lege, che a totu sos interventos chi non sunt istruturales, est unu rimèdiu chi parat fronte a s’emergèntzia ma no a sos problemas de su pastore e, mascamente, no evitat chi sa matessi situatzione si torret a presentare s’annu imbenente.
Pro essire dae sa crisi cheret a fàghere pro prima cosa providimentos, chi de su restu non costant nudda, chi punnent a sa craresa e a àere datos produtivos seguros. Oe no ischimus cantu late murghent in Sardigna nen cantu de custu late est fatu a casu. No ischimus ite gastas de casu faghent, ne in ue est bèndidu e a cale preju. Non benit bene a programare unu setore sena ischire custu.
S’ùrtima lege regionale, mentovada in antis, previdet chi, si su pastore cheret pigare su finantziamentu, depet decrarare su tantu de bestiàmene chi tenet e su late chi versat in caseifìtziu.
Est unu primu passu. Ma tocat de sighire in custa àndala e tando cheret a:
- impònnere a sos caseifìtzios chi retzint dinare pùblicu de comunicare sos datos produtivos e cumertziales;
- pretèndere chi su Ministèriu de s’Agricultura emanet su decretu atuativu de s’art. 151 de su Regulamentu (Ue) n. 1308/2013, chi òbrigat sos caseifìtzios a comunicare mese cun mese su tantu de su late chi còmporant. Custa règula in Itàlia b’est giai pro su late bàchinu e in Frantza e Ispagna finas pro su late berbeghinu;
- dare dinare pùblicu petzi a sos caseifìtzios chi rispetant sas cuotas de produtzione de su Casu romanu istabilidas dae su programa de autoregulamentatzione de su Cunsòrtziu de tutela, ca est sa produtzione in prus de Casu romanu chi at causadu sa crisi. Su 23 de martzu de ocannu su presidente de su Cunsòrtziu at naradu chi 8 sòtzios ebbia, subra de 40, aiant leadu parte a su programa de autoregulamentatzione produtiva.
B’at de s’augurare chi oe siant de prus, si nono est craru chi b’at argunos chi dae custa crisi non bi cherent essire, antis la cherent mantènnere pro cumbèniu issoro.
(*) Confagricoltura Sardigna
Non lasciare decidere l'algoritmo:
scegli La Nuova Sardegna per le tue notizie su Google
