La Nuova Sardegna

ORUNE. Nch’at coladu duas chidas dae su referendum pro s’indipendèntzia de sa Catalugna dae s’istadu ispagnolu. Sa proclamatzione de sa repùblica, cun sa vitòria de su “Sí/Òc”, fiat dèpida lòmpere a pustis de 48 oras dae su resurtu de sa cramada (a su chi narat sa lege aprovada dae su “Parlament”) ma nemmancu sa setziada de su 10 de custu mese at tzertificadu sa nàschida de s’istadu nou. Su disafiu indipendentista, a pustis de su votu e de sos corfos retzidos dae sa Guardia civil, nch’est duncas intradu in una fase crìtica, cun Mariano Rajoy chi minetzat s’acabbu de s’autonomia. Ma ite b’at de nàrrere de su protzessu chi galu non s’ischit? Nd’amus allegadu cun Càralu Pala, politòlogu orunesu e autore de su libru “Idee di Sardegna. Autonomisti, sovranisti, indipendentisti oggi” imprentadu dae sos de Carocci.

Catalugna no est Padània. Beru est?

«Prus chi non beru. Su catalanu est unu pòpulu e sa Catalugna est una natzione cun un’istòria, una cultura e una limba. Beru est chi est una de sas terras prus ricas de s’istadu ispagnolu, ma beru est finamentas chi b’at prus richesa in sa comunidade de Madrid e in Euskadi. Semper e cando s’indipendentismu catalanu no est de màdrighe egoìstica. Est solidale e progressista».

Tesi chi, pro Pala, est iscumproada finamentas in su caminu iscotzesu comente risposta a sas polìticas econòmicas austeras de sos guvernos tzentrales.

Su Scottish national party, ammentemus·nos·lu, at retzidu sustegnu mannu dae s’eletoradu laburista.

«Sa Catalugna – nos contat Pala – est una natzione fraigada chi est in cherta de s’istadu suo. Una “nation built” chi at mòvidu dae su contivìgiu de sa limba e dae sa cultura e chi nche cheret lòmpere a su “state building”. In sa sièntzia polìtica si costumat a nàrrere chi una natzione o est polìtica o no lu est. E gasi cherent fàghere in cue».

Ma no un’istadu che a s’ispagnolu, resurtu de una transitzione chi at chertu mantènnere sa monarchia.

«Una repùblica. E custu est su chi lis dat anneu a su re e a sa dereta de Rajoy».

Ammentada sa traditzione democràtica e progressista de su pòpulu catalanu omagiadu dae Orwell contra a Franco e avanguàrdia antifascista.

«Sa cherta de s’autodeterminatzione issoro – galu Pala – no est petzi una punna istatuale. Est su disìgiu de su pòpulu catalanu de pigare cale si siat disinnu in cada campu: polìticu, culturale, econòmicu». Comente s’at a evòlvere su protzessu catalanu? Rajoy minetzat. Sa Cup pedit a Carles Puigdemont de fàghere in presse. Amus a bìdere.