La Nuova Sardegna

THINISCOLE. Su 14 de làmpadas de su 2017, s’Organizatzione de sas Natziones unidas pro s’educatzione, sa sièntzia e sa cultura at decraradu “Riserva de sa bioisfera” in su programma MaB de s’Unesco, una parte de sa Sardigna norte-orientale chi pertocat sas biddas de Alà, Bitzi, Buddusò, Budune, Garteddi, Irgoli, Lodè, Lòcula, Lùvula, Onanie, Orune, Osidde, Padru, Santu Diadoru, Thiniscole e Torpè. A èssere Riserva de sa Bioisfera est un’impignu pro su tempus benidore chi sas comunidades s’ant leadu, unu valore in prus de su territòriu ca movet dae una visione noa de su logu, dae sa punna de una crèschida sustenìbile, de su megioru de sa calidade de sa vida, de s’avaloramentu de sos produtos locales e de s’educatzione ambientale.

In contu de custu, est acraridora sa frase de Irina Bokova, s’ex diretora generale de s’Unesco: «Si su Patrimòniu mundiale agiudat a costoire sos valores, sas Riservas nde faghet a nou». Est custa sa diferèntzia manna intre su programma Heritage, su chi tutelat sos benes materiales e immateriales reconnotos Patrimòniu mundiale de s’umanidade, e su programma MaB, su chi sejat “laboratòrios de isperimentatziones, de chircas, de istùdiu e de isvilupu sustenìbile” in sos territòrios reconnotos comente Riserva.

E sa faina est dimprende die cun die: sos noe Ceas chi bi sunt in sa Reserva sarda ant comintzadu a traballare pro coordinare sas atividades de s’Ufìtziu MaB, chi est parte de su Comitadu de gestione de sa riserva de bioisfera, nàschidu de reghente in un’addòbiu fatu in Irgoli e cumpostu de sos magiores Entes e de sos rapresentantes de su setore sòtziu-econòmicu de su territòriu. S’Ufìtziu MaB, chi s’at a riunire a nou su 5 de nadale in Santa Lughia de Thiniscole, favoresset s’atuamentu e su controllu de su programma Unesco, faghet a segreteria organizativa e contivìgiat sa comunicatzione, mescamente de sa pàgina Facebook, chi est registrende una crèschida manna de visitadores pro more de sos artìculos publicados a ispissu dae sos operadores de sos Ceas e in ue si contat de sas traditziones, de sas caraterìsticas e de sas richesas de sas 17 comunidades de sos territòrios reconnotos dae S’Unesco, sena s’ismentigare de tènnere a incuru una dimensione internatzionale, pro chi tèngiat visibilidade fintzas foras de s’Itàlia. Su còmpitu suo est su de informare de sos valores de sos logos pro chi nascat una cussèntzia forte: cun custa idea at a nàschere unu mòdulu didàticu pro promòvere sa connoschèntzia de custos valores in intro de sas iscolas.