La Nuova Sardegna

BÀNARI. S’innu seculare de s’artista canadesu adatadu dae su musitzista tataresu Lisandru Carta: «Cheria agatare sos motivos de custu càntigu misteriosu» In una chirca publicada in su Journal of media and religion, su professore Steven Thomsen de sa Brigham Young University at individuadu unos cantos critèrios pro calificare una cantzone definida innu seculare: issa devet barigare sas generatziones; su tema printzipale suo est su de sa liberatzione; diat dèvere pòdere evocare sentidos de màdrighe religiosa sena lu èssere; devet cuntènnere metàforas chi pertocant su binòmiu lughe/iscurigore; su significu suo nche colat sa tarea originària cun mudadas de livellu semiòticu; podet èssere impreada pro acontèssidas de importu. E cale diant dèvere èssere custos innos seculares? Thomsen nd’at inditadu unos cantos: “Somewhere Over the Rainbow”, “Don’t Stop Believing”, “Imagine”, “Free Fallin”, “What a Wonderful World”. Ma finamentas (e mescamente) “Hallelujah” de Leonard Cohen. Cantzone chi, mancari su tìtulu e sos riferimentos bìblicos prus chi non craros, no est religiosa. B’at chie l’at torrada a interpretare cun maestria. Pensemus a Jeff Buckley, su cantautore chi nos lasseit binti annos a como abbratzende·si sas abbas de su riu Wolf, in Memphis. Ma su chi contat inoghe àteru est. Ca, in s’ìnteri chi sighit sa dibata in contu de limba e liturgia, b’at chie, in sas chidas coladas, nd’at bogadu a campu una versione sarda de custu innu.

Nicola di Bànari, est a nàrrere Lisandru Carta (musitzista e vocalista polièdricu de sos Nasodoble), at disinnadu de lassare sa trata in Youtube e Deezer proponende·nos una boghe funduda subra de un’arpègiu de chiterra e unos cantos tzìrrios de violinu (sonadu dae Pepinu Anfossi). Sos faeddos, insertados bene in sa guarnissa aprontada dae s’artista canadesu, non si nch’istèsiant meda dae sa versione originale: «The baffled king» est «su re ’e sos boes»; in carchi tretu s’adatamentu est fidele (dae «there’s a blaze of light in every word» a «b’at lughe in sas peraulas», dae «I did my best, it wasn’t much» a «su menzus ch’apo est pagu»); àteras bias sos cuntzetos pigant un’àtera àndala mancari mantenende sos faeddos crae, in custu casu sos nùmeros (pensemus a sa duina «the fourth, the fifth, the minor fall, the major lift» chi devennet «dae battor boghes de nues, giagat sa ’e chimbe chei su nie»). «In intro de su sonu de sos faeddos nostros – narat Nicola – cheria agatare sos motivos de custu Hallelujah gosi misteriosu. Cheria cumprèndere pro ite Cohen faeddat de “broken Hallelujah” e, duncas, chircare cussu tipu de disisperu prenu de reconnoschèntzia in su faeddu cruu nostru».