BÀRGIU: colore, sambenadu e arangiolu
Su faeddu “bàrgiu” derivat dae su lat. «varius» in ue cheret nàrrere “diferente”. In sardu, comente agetivu e sustantivu, “barju, bàrgiu, barzu, bàgliu” inditat su colore de de sa pedde de animales,...
1 MINUTI DI LETTURA
Su faeddu “bàrgiu” derivat dae su lat. «varius» in ue cheret nàrrere “diferente”. In sardu, comente agetivu e sustantivu, “barju, bàrgiu, barzu, bàgliu” inditat su colore de de sa pedde de animales, a mantzas o pintulinada; ma finas su colore de sos ogros de sa pessone. Unu colore non definidu bene o de passàgiu dae unu a s’àteru, chi currispondet pagu prus o mancu a s’italianu “variegato”, chi in sardu est finas “trinu”. Duncas, “Bàrgiu” (Vàrgiu) est finas connotu comente sambenadu, ispainadu mescamente in sa parte meridionale de s’ìsula e in su de Casteddu. De seguru, sa matessi idea riferida a su colore b’est in su faeddu “bàrgia”, pro inditare una casta de arangiolu, tìmidu meda in Sardigna, ca, mossighende sa pessone, dat dolore forte cun su venenu suo. Currispondet a s’ita. “Malmignatta” (Latrodectes tredecimguttatus). In unas cantas biddas de Sardigna, su faeddu “bàrgiu, varju” lu narant pro una pessone chi modernamente est “ipòcrita”, dae ue derivat “bargiulìu” pro inditare sa “ipocrisia”, es: “est unu bàrgiu; est una pessone bàrgia; est totu bargiuliu su suo”. (d.corràine)
Non lasciare decidere l'algoritmo:
scegli La Nuova Sardegna per le tue notizie su Google
