La Nuova Sardegna

GAVOI. Gavoi capitale sarda de sa poesia. In s’acabbu de sa chida colada sos amantiosos de su versu si sunt atopados in sa bidda barbaritzina pro sa de tres editziones de “Invasione poetica”, tres dies de initziativas peri sas carreras, sos tzilleris, sas chentinas e logos pùblicos che a sa biblioteca e a sa caserma betza. Sa manifestatzione l’at promòvida s’amministratzione comunale in pare cun àteras realidades, ponende in su programma mustras, projetziones, laboratòrios pro pitzinnos e resadas. E fintzas sa finale de su de chimbe campionados sardos de Poetry Slam, s’arte chi aunit sos versos iscritos e sa rapresentatzione de sos matessi cara a unu pùblicu e a una giuria populare seberada intre sos presentes.

In dòighi b’ant pigadu parte, duos pro cada tretu de Sardigna in ue b’at àpidu garas: Roberto Demontis e Alessandro Doro (Tàtari), Valerio Camera e Alice Scano (Casteddu), Andrea Doro e Pupa Niolu (S’Alighera), Giovanni Oliva e Federico Pinna (Portu Turre), Enrico Pedrini e Annalisa Concu Robin (Aristanis/Bosa), Mauro Piredda e Valentina Loche (pro sa zona de su Nugoresu). In sa gara finale, conduida dae Sergio Garau, maistru de tzerimònias e presidente de sa Lips (Lega italiana Poetry Slam), sos poetas ant resadu sa prima poesia issoro. A su segundu turnu, cunforma a sos votos de sa giuria (contados dae su notàju Giovanni Salis), che nd’at coladu petzi ses. In tres, in fines, nche sunt cròmpidos a sa fase ùrtima: Piredda, Andrea Doro e Scano. A pustis de una gara sena pasu, animada finamentas dae su performer Stefano Raspini (cun tributos a Majakovskij e versos suos dissacrantes), Garau at annuntziadu sos binchidores. Ocannu su tìtulu de campione sardu l’at conchistadu Piredda, giornalista de sa Nuova Sardegna, banaresu/thiniscolesu chi at presentadu custas tres poesias: “Nuscos”, a comintzu, e duas cun mètrica traditzionale sarda, “Sos binos de Baudelaire” e “Sas abbas tuas”, custa dedicada a s’amorada sua.

«Vitòria a banda – at naradu Piredda – su disìgiu mannu fiat su de cunfrontare sos versos meos cun sos de sos àteros apassionados in sa chi, a bisu meu, est sa mègius pratza pro los propònnere. Cun su slam sa poesia bivet sa dimensione comunitària sua: non b’at espertos chi disinnant o mancu de ti dare sa patente de poeta; s’inclusione e sa partetzipatzione sunt s’abc de custa fòrmula». In prus de Piredda, finamentas su tataresu Demontis at poetadu in sardu cun “Ispìritu invisìbile”. A Oliva su prèmiu de sa crìtica. Piredda e Scano si sunt cualificados pro sas finales italianas de Gènova.