“Vocabulàriu sardu a figuras”, pro cumintzare a imparare
Gràtzias a su patronadu de sa Generalitat de Catalunya, de sa Diretzione generale de polìtica linguìstica catalana e a s’interessamentu de sa Sotziedade pro sa limba sarda, sas editziones Papiros...
1 MINUTI DI LETTURA
Gràtzias a su patronadu de sa Generalitat de Catalunya, de sa Diretzione generale de polìtica linguìstica catalana e a s’interessamentu de sa Sotziedade pro sa limba sarda, sas editziones Papiros pùblicant custu vocabulàriu sardu, destinadu mescamente a sos istràngios chi cherent imparare sas primas 1.000 paràulas de su sardu, cun figuras de s’artista Montserrat Ginestra, chi inditant cada cosa de domo, de su sartu, de s’iscola, de su mare, de sos ufìtzios pùblicos, de su mercadu, de sas butegas, etc. Ma est un’agiudu finas pro sos sardos chi no imparant in famìlia sa limba nostra. Su libru, totu a colores, est de 100 pàginas in formadu A4. «Sa limba sarda e sa limba catalana, ambas duas de traditzione latina e europea, s’adòviant che sorres in custu progetu chi las aunit finas in su matessi propòsitu de modernidade, progressu e crèschida» narat cun craresa Ester Franquesa, diretora generale de polìtica linguìstica, presentende s’òpera, giai publicada in catalanu annos a como.
Non lasciare decidere l'algoritmo:
scegli La Nuova Sardegna per le tue notizie su Google
