La Nuova Sardegna

Butega e fantasia 

S’arte de produire cun sas manos

S’arte de produire cun sas manos

Caterina Cirotto, tataresa de 51 annos, cojuada, visual merchandiser, contat de s’iscola sua, “Scuola Impara L’arte”, ue talentu e ideas espressadas in cumpangia diventant unu mamentu de dirgàgiu, de...

27 settembre 2020
3 MINUTI DI LETTURA





Caterina Cirotto, tataresa de 51 annos, cojuada, visual merchandiser, contat de s’iscola sua, “Scuola Impara L’arte”, ue talentu e ideas espressadas in cumpangia diventant unu mamentu de dirgàgiu, de traballu e de terapia sotziale.

Caterina, un’iscola de handmade it’est?

«Pertocat s’artisania prus simple cun sa cale si podet espressare unu messàgiu ue sa paràula est sa decoradura. Duncas in un’iscola de “handmade” si faghent traballos ue, cun sensibilidade e fantasia, benint impreadas sas manos pro produire ogetos. Si podet fàghere cosìngiu de bestes, cosìngiu creativu cun su feltro, pintura, disignu, decoupage, latzinu fritu, prendas de roba».

E b’ais finas carchi novidade chi pertocat sa natura?

«Si faeddat de su “ecoprinting” pro tìnghere sa roba cun frores e prantas. Duncas faghimus cursos cun maistros cumpetentes in sas diversas materias. A bortas cumbidamus maistros artistas dae sa Sardigna tota e finas dae Continente, pro b’àere una diversidade de connoschèntzias».

Comente ti ses agatada amantiosa de sas artes manuales?

«In su ’92 aia incumentzadu a traballare in s’azienda de mòbiles pro butegas, de babbu meu. In cue bi fiat su campu de “S’incuru de sas bedrinas”. A s’ora, mi so agatada amantiosa de s’arte de imbellire bedrinas a su puntu chi mi fia ispetzialigiada comente “visual merchandiser”. Dae custa atividade m’est nàschida sa passione pro sas decoraduras. Tando apo frecuentadu unos cantos cursos e apo finas istudiadu a sa sola pro imparare semper mègius su chi bisongiaiat de ischire».

E comente bi ses lòmpida a abèrrere un’iscola tua?

«Dae su 2003 a su 2010 apo traballadu in una cartoleria de Tàtari faghende imprentas digitales subra de su pabiru de risu. Dae tota s’esperièntzia achirida apo disigiadu de imparare a sos àteros su ch’ischia deo. Pensende a sos talentos de cada pessone e a s’arte antiga de sas cosas produidas in domo cun s’impitu printzipale de sas manos e de s’imbentu, apo abertu s’iscola mea».

Ite dischentes b’as e ite edade tenent?

«Potzo nàrrere chi sas fèminas, pro como, sunt sas protagonistas! Mescamente a su comintzu sas meres de domo, intradas in tempus, fiant sas dischentes chi, a sos cursos, s’iscriant de prus. Oe in die, a sa gente manna de in antis, finas de setantachimbe e otanta annos, si sunt annanghende giòvanas meda, a inghìriu de sos trinta annos, ca bident custos cursos finas comente un’oportunidade de formatzione pro un’atividade chi potzat mirare a su tempus benidore».

Pensas chi sa presèntzia de sas giòvanas potzat èssere cunsighèntzia de sa disocupatzione?

«Eja. De seguru su fatu de no àere unu traballu faghet pensare a comente impreare cada die su tempus. E tando si cumprendet chi su traballu podet nàschere dae sas manos nostras deretu.

Fieras e laboratòrios a nde ammaniades?

«Cando podimus finas fieras e laboratòrios a tema ispetzìficu. Pro su prus sa gente chi bi leat parte, manìgiat giai custos traballos, ma pro sorte bona sa curiosidade faghet acurtziare, a bellu a bellu, finas sos chi pensaiant chi custas artes fiant unu disaogu simple ebbia».

Cada dischente traballende cun sas manos ite iscumproat?

«Cada unu iscumproat canta passèntzia tenet, canta fantasia, canta gana de isperimentare tècnicas noas. E su chi si bidet intre sos chi leant parte a sos cursos est su disìgiu e sa capatzidade de si relatare».

In custa sotziedade chi andat in presse, inghiriada dae su mundu sena làcana de sa tecnologia, su handmade, pro tene, est de importu?

«De importu mannu! ca custos traballos ghiant sa pessones pròpiu a firmare su tempus. Agiudant a iscobèrrere talentos chi si fiant cuados in s’ànima mudos mudos».

Artes manuales, fèminas de eris e de oe, cale ligàmine tenent?

«Acanta a sa figura de una fèmina, naramus “in carriera”, non bisòngiat de nche las pònnere a banda sas capatzidades de produire e annoare cada cosa cun cuddu sentidu de fèmina, mugere, mama».

Il nuovo decreto

«La mannaia sul Superbonus devasterà tantissime vite»

di Luigi Soriga
Le nostre iniziative