La Nuova Sardegna

TZIRCU SOTZIALE 

Nicola Virdis, una vida de giogolleri

Nicola Virdis, una vida de giogolleri

Nicola Virdis, tataresu ch’istat in Venaria Reale (Torino), 38 annos, cojuadu e cun duas fìgias. At coltivadu, cun aficu mannu e istùdios, sa passione pro sas artes tzirtzenses, pro sa clownterapia e...

10 gennaio 2021
3 MINUTI DI LETTURA





Nicola Virdis, tataresu ch’istat in Venaria Reale (Torino), 38 annos, cojuadu e cun duas fìgias. At coltivadu, cun aficu mannu e istùdios, sa passione pro sas artes tzirtzenses, pro sa clownterapia e pro su tzircu sotziale, finas a imbentare Nerd, unu pessonàgiu sena faeddu.

Nicola, su coro tuo s’est ligadu a sas artes tzirtzenses, pro ite?

«Dae pitzocheddu, cada merie, andaia a domo de giaja mea. A s’ispissu beniat unu tiu meu chi m’imparaiat cosas meda. Una borta m’at ammustradu comente si faghiant rodeare 3 botzitas sena las fàghere rùere a terra. Dae tando, so divènnidu amantiosu de sas artes de giogolleri».

E a bi traballare comente bi ses lòmpidu?

«Imparende a sa sola. Ordingiaia, paris cun carchi amigu, ispetàculos o in sas pratzas o pro sas festas de compleannu. In su 2004 apo leadu parte a unu cursu de “Clown de Corsia” e so divènnidu bolontàriu. Deretu so intradu in s’iscola de tzircu Vertigo de Torino, in ue, a pustis de 2 annos de istùdios de sas artes tzirtzenses, apo leadu su tìtulu de “Artista de tzircu contemporàneu”».

Finas formadore ses?

«Eja. Apo formadu pagu prus o mancu duas mìgias pessones in s’Italia tota».

Podet pàrrere fàtzile, ma unu giogolleri cantu istùdiat?

«Naro ebbia chi, pro fàghere rodeare a su matessi tempus 3 botzitzas sena nche las ghetare a terra, unu giogolleri s’allenat cada die pro un’annu intreu».

A unu clown, mescamente, ite li tocat de imparare?

«De atzetare su refudu. Fàghere a rìere est su traballu de un’artista tzirtzense, ma cuddu nare ruju, in s’aposentu de un’ospidale, in una comunidade terapeùtica, in unu ricòveru o in una presone, non semper intrat in sa die giusta pro èssere agradessidu. Custu tocat de l’imparare!».

It’est su tzircu sotziale?

«Giogos ordingiados dae su clown paris cun sos chi leant parte a su progetu. Si nde bogat a pìgiu s’autoistima de cada unu fraighende una “piràmide umana” in ue totus sunt de fundamentu. Sa règula est: rìere e s’ispassiare».

Su Tzircu Sotziale, nde l’as batidu a Tàtari, beru?

«Eja. Colados 6 annos in Torino, in su 2010 cun unu furgone so torradu a Tàtari. Apo ordingiadu progetos pro sos amantiosos e finas pro sa “comunidade terapeùtica s’Aspru” de Sìligo chi recùperat sos chi tenent dipendèntzias».

“S’Aspru”, it’esperièntzia est istada?

«A livellu umanu una crèschida personale arta meda. Pro 7 annos pagu prus o mancu so andadu a sa comunidade a fàghere tzircu sotziale cun su progetu “Buonumore in comunità”. A cada adòbiu daia unu tema e paris cun sos chi bi leaiant parte giogaia finas deo. Sa mira fiat cussa de fàghere ismentigare sas tristuras de sa vida, chirchende semper de avalorare sa personalidade de totus».

In logos istràngios progetos a nd’as fatu?

«Emmo. In Romania in sas presones pro minores, in Cambògia in sas bidonvilles e in Lìbanu cando fiat peleadu dae sa gherra apo leadu parte a unu progetu de formatzione arta de sa terapia de su risu».

Italia’s Got Talent 2019, Golden Buzzer, su de tres prèmiu, nara∙nos, it’as proadu?

«Cuntentesa manna a beru! Mai mi l’apo a ismetigare! Nen m’apo a ismentigare sos àteros Talents in Frantza, Ispagna, Germània. “Nerd” est istadu agradessidu in totue».

Chi est Nerd, imbentadu tue l’as?

«Eja! In su 2006 posca de unu cursu tzirtzense su maistru clown aiat pedidu de ordingiare un’ammustra. Deo apo imbentadu “Nerd", pessonàgiu mudu, giogolleri, birgongiosu, isambesciadu, chi si mustrat impitende istrumentos de sos annos ’80 faeddende petzi cun sos ogros e cun su corpus».

Pro ite una comunicatzione sena faeddu?

«Pro èssere geniosu non serbit a allegare o a fàghere cosas istraordinàrias. “Nerd” comente s’amustrat amajat luego su pùblicu chi lu mirat».

Su de su clown ite limbàgiu est?

«Universale, ca lòmpet a totus».

Social, teatru diretu, s’importu de si relatare. Nicola ite nde pensat?

«Oe in die, cun s’acudida de sa tecnologia ch’inghìriat sa conca de figuras e de sonos, a fàghere a rìere unu pitzinnu est prus fainosu de fàghere a rìere unu mannu. Ma non b’at a èssere mai app peruna ch’emotzionet cantu un’ammustra direta in pratza, cun sa gente chi si cundit su risu unu cun s’àteru».

Il nuovo decreto

«La mannaia sul Superbonus devasterà tantissime vite»

di Luigi Soriga
Le nostre iniziative