La Nuova Sardegna

Maria Giovanna Pani, 41 annos, tataresa. Dae pitzinna amantiosa de totu su chi pertocat sa moda. Cun istima e aficu est lòmpida a ordingiare a manera professionale sos cojos, aunende professionistas e mestieris diversos, in su traballu suo de wedding planner.

MaryGiò, nùmene de arte tuo, dae pitzinna ite t’agradaiat?

«Sa moda. A pustis, finas a sos 24 annos, apo leadu parte a unos cantos cursos de matèrias hobbysticas, de tècnicas de decoradura e acontzos, finas a iscobèrrere sas decoraduras cun frores de pabiru. Apo connotu artisanos meda».

Pro nche lòmpere a su mundu de sos eventos dae ue as cumentzadu?

«In antis apo traballadu cun bendidores de frores ebbia. Posca apo traballadu in una butega, ue, in prus a sa bèndida de frores si traballaiat pro eventos e cojos. Potzo nàrrere chi su de àere connotu su mundu de sos frores, in sos ogros, m’at atzesu s’incantu».

Pro ite?

«Ca sos frores faeddant. Una cumpositzione, cun sos colores e sos nuscos suos, contat s’ispantu de un’emotzione. Mi so ispetzialigiada semper mègius finas a ordingiare deo sas dies de sos cojos pro sos isposos».

Tue ses wedding planner e wedding designer, a nos acraras sa diferèntzia?

«Sa wplanner s’impinnat a ordingiare e ghiare totus sos professionistas chi serbint pro cumprire unu coju. Sa wdesigner faghet su progetu pro su chi si mutit “efetu Wow”. Est a nàrrere totu su chi sos cumbidados bident in su coju e chi devet ispantare e donare majia. Duncas sigo sos isposos e s’eventu a manera totale».

A ordingiare unu coju comente s’incumentzat?

«In antis de totu s’adòbiant sos duos amorados. Custu est unu tretu dìligu meda ca lis pedo de mi contare s’istòria issoro finas a cussu mamentu. Sos bisos, sos disìgios, su chi s’isetant dae una festa de coju. Pro sa parte tècnica, si chistionat finas de sas possibilidades finantziàrias chi tenent».

Duncas, iscoberis parte de sa vida issoro. Cantu est de importu s’empatia?

«Meda a beru! Ca a bias m’est capitadu calicunu sena carrales a palas. Tando deo non fatzo petzi sa professionista ma finas sa cussigera e s’amiga».

Sa “fide” intre sas pessones cantu contat in custu traballu?

«Est su chi tràsinat s’atividade. Sos isposos si fidant de mene. Deo mi fido de totus sos professionistas chi pro s’eventu traballant».

A parusu pro ordingiare unu coju cantu tempus serbit?

«Pagu prus o mancu un’annu e mesu».

E sos professionistas, in medas sunt?

«Naramus chi mudant a segunda de s’eventu. Dae sos 15 a sos 20. Faeddamus de su fotògrafu, su musitzista, sa màchina, s’estetista, su barbieri e gosi sighende».

Sa die de su coju, cantu tempus de traballu ti pedit?

«A mie semper 21 oras. Su traballu nostru sighit finas a pustis de s’eventu ca bisòngiat de lassare su logu ue s’est festadu comente fiat in antis de s’eventu. Acabada sa festa s’iscontzat totu s’allestimentu ammaniadu pro sa die e custu pedit brios e passèntzia».

Unu mèdiu publitzitàriu pro custu setore est su shooting, it’est?

«S’ùrtimu l’amus ordingiadu in Àgius. Si partit isseberende unu logu chi nos agradat. In Sardigna, dae su mare a su sartu, de logos ispantosos, nd’amus meda. Comente chi b’esseret unu coju, si faghet un’allestimentu fintu. Posca s’iscatant fotografias in cantidade e sas mègius si pùblicant in su web. Duncas, a sos amorados chi disìgiant s’agiudu de sa wedding planner, damus a bìdere s’interpretatzione de comente at a èssere s’afidu ordingiadu dae nois».

Duncas finas sa wedding planner amustrat comente si diat pòdere pintare sa majia de un’eventu?

«Tzertu. Non sunt sos clientes ebbia chi chircant sa professionista. Ma finas deo chirco chie at pensamentos e bideas de s’eventu assimigiante a s’interpretatzione de sos bisos e de sos disìgios cosidos cun s’ograda mea».

In unu coju, cale emotzione ti caentat su coro?

«Sa de bìdere totu su logu bene decoradu. Sighende su progetu, bìdere cada cosa ammaniada bene. A s’ora, àrtziende sos ogros a su chelu, penso a mama mea, chi non tèngio prus dae annos, e a s’iscùsia li naro “tota custa galania a tene la intrego”».