Unu bisu mannu
Energia contra a s’ispopulamentu
Su de nche lòmpere a s’indipendèntzia energètica est unu bisu chi comintzat a si cuncretizare. Boruta, bidda de su Meilogu intre su monte Pèlau e su muristene de Santu Pedru de Sorres, nemmancu 300...
4 MINUTI DI LETTURA
Su de nche lòmpere a s’indipendèntzia energètica est unu bisu chi comintzat a si cuncretizare. Boruta, bidda de su Meilogu intre su monte Pèlau e su muristene de Santu Pedru de Sorres, nemmancu 300 sos abitantes, est dae pagas dies sa prima comunidade energètica rinnovàbile de Sardigna. A custa idea est dae su 2012 chi ant cominintzadu a li pònnere sas ancas, cun su Paes, su pranu de atzione pro s’energia sustenìbile. Como s’iscummissa, movende dae custa conchista, est sa de nche tòddere a custa bidda sa minetza de s’iscumparta annuntziada prus de una borta.
Ma ite cheret nàrrere comunidade energètica rinnovàbile?
«Est un’assòtziu intre Comuna e tzitadinos – gasi Silvano Arru, su sìndigu – pro sa produtzione e s’autoconsumu de energia ingendrada dae su sole e dae su bentu ebbia. Sos tzitadinos-atzionistas tenent energia gratùita, deretu de votu e sa possibilidade de retzire intzentivos pro s’energia consumada. Sa populatzione at a èssere protagonista de custa impresa in intro de sa fòrmula de s’atzionariadu populare. Comente amministratzione amus a coordinare».
Comente bi seis lòmpidos?
«B’amus crèidu deretu. Un’annu a pustis chi sos borutesos nos nch’ant sètzidu (Arru est sìndigu dae su 2011, ndc) amus comintzadu a bi traballare assistidos dae Sardegna ricerche e binchèimus su bandu regionale “Smart cities” intrende primos. Nche semus lòmpidos a su 100% de autoprodutzione, ma giai in antis de como autoproduìamus in su palatzu comunale, in sas istruturas isportivas e iscolàsticas, in su tzentru polifuntzionale, in su museu, in sa biblioteca, in sa residèntzia pro sos antzianos e in sos ristorantes chi amus a dare in gestione comente nos nch’amus a lassare su covid a palas. De custa manera s’illuminatzione pùblica est indipendente dae tempus cun possibilidade de frunire energia pro sas bitzicletas elètricas. Como semus indipendentes finamentas in contu de consumos privados».
Pro sos borutesos ebbia?
«Pro sos borutesos e pro cale si siat persone o famìlia chi si nch’at a bènnere a inoghe. Nois pensamus chi custa siat una manera, intre sas medas chi si podent aplicare, contra a s’ispopulamentu. Boruta est una bidda chi, a bisu de sos chi ant istudiadu sas tendèntzias insediativas umanas, non diat dèvere vìvere pro tempus meda. Cun sa comunidade energètica rinnovàbile nos candidamus a collire sos chi cherent istare in unu logu galanu e bene cullegadu cun tzitades, portos e aeroportos».
E cun sa difusione de su virus corona sa gana de vìvere in logos minudos est finamentas crèschida, no?
«Mai s’esseret presentadu custu virus, ma custu perìodu istòricu particulare est mustrende carchi disìgiu chi fiat o pariat cuadu: sa gente tenet bisòngiu de si nch’istare in logos chi no apant densidade manna de populatzione. Sa calidade de sa vida est unu fatore chi comintzat a èssere carculadu dae gente meda. Nois semus faghende sa parte nostra e amus comporadu finamentas carchi domo chi amus a annoare cun su superbonus 110%. A concruos de su 2021 amus a èssere a tretu de las dare a còpias de giòvanos».
Ma dae artu menguant sos servìtzios, beru?
«Comente comunidades semus gherrende pro chi non sigant a tancare. In Tiesi b’at possibilidade chi no abèrgiant una prima classe de su Tècnicu. Ma repito chi su covid nos est nênde chi nùmeros minores podent contare prus de sos mannos. E classes de iscola cun pagos pitzinnos podent èssere una solutzione. Si aiant abertu sas iscolas chi ant tancadu in custos annos no aìamus àpidu nemmancu sos postales prenos».
Sole e bentu. De palas èolicas bos nche nde cheriant pònnere in Pèlau, carchi annu a como. Aìais naradu chi nono.
«Cussa fiat ispeculatzione energètica e non bincheit. Est s’idea de su profetu de sa gente nostra chi binchet. Tando, comente Comuna, l’aìamus iscritu finamentas in su Puc chi non nde cherìamus de cussas palas. Como una l’amus a pònnere nois in bidda, ma est un’àtera istòria, e nch’at a èssere in intro de sa comunidade energètica».
Tue rapresentas puru s’Unione de su Meilogu, beru? A Boruta ebbia ses pensende?
«Nono ca su progetu si diat pòdere replicare. Tzertu, in biddas prus mannas comente Tiesi, Bonorva e Putumajore bi diat àere carchi dificultade de prus. Ma su venidore est birde. Bi resessint in Goteborg, bi la podimus fàghere fintzas nois».
Ma ite cheret nàrrere comunidade energètica rinnovàbile?
«Est un’assòtziu intre Comuna e tzitadinos – gasi Silvano Arru, su sìndigu – pro sa produtzione e s’autoconsumu de energia ingendrada dae su sole e dae su bentu ebbia. Sos tzitadinos-atzionistas tenent energia gratùita, deretu de votu e sa possibilidade de retzire intzentivos pro s’energia consumada. Sa populatzione at a èssere protagonista de custa impresa in intro de sa fòrmula de s’atzionariadu populare. Comente amministratzione amus a coordinare».
Comente bi seis lòmpidos?
«B’amus crèidu deretu. Un’annu a pustis chi sos borutesos nos nch’ant sètzidu (Arru est sìndigu dae su 2011, ndc) amus comintzadu a bi traballare assistidos dae Sardegna ricerche e binchèimus su bandu regionale “Smart cities” intrende primos. Nche semus lòmpidos a su 100% de autoprodutzione, ma giai in antis de como autoproduìamus in su palatzu comunale, in sas istruturas isportivas e iscolàsticas, in su tzentru polifuntzionale, in su museu, in sa biblioteca, in sa residèntzia pro sos antzianos e in sos ristorantes chi amus a dare in gestione comente nos nch’amus a lassare su covid a palas. De custa manera s’illuminatzione pùblica est indipendente dae tempus cun possibilidade de frunire energia pro sas bitzicletas elètricas. Como semus indipendentes finamentas in contu de consumos privados».
Pro sos borutesos ebbia?
«Pro sos borutesos e pro cale si siat persone o famìlia chi si nch’at a bènnere a inoghe. Nois pensamus chi custa siat una manera, intre sas medas chi si podent aplicare, contra a s’ispopulamentu. Boruta est una bidda chi, a bisu de sos chi ant istudiadu sas tendèntzias insediativas umanas, non diat dèvere vìvere pro tempus meda. Cun sa comunidade energètica rinnovàbile nos candidamus a collire sos chi cherent istare in unu logu galanu e bene cullegadu cun tzitades, portos e aeroportos».
E cun sa difusione de su virus corona sa gana de vìvere in logos minudos est finamentas crèschida, no?
«Mai s’esseret presentadu custu virus, ma custu perìodu istòricu particulare est mustrende carchi disìgiu chi fiat o pariat cuadu: sa gente tenet bisòngiu de si nch’istare in logos chi no apant densidade manna de populatzione. Sa calidade de sa vida est unu fatore chi comintzat a èssere carculadu dae gente meda. Nois semus faghende sa parte nostra e amus comporadu finamentas carchi domo chi amus a annoare cun su superbonus 110%. A concruos de su 2021 amus a èssere a tretu de las dare a còpias de giòvanos».
Ma dae artu menguant sos servìtzios, beru?
«Comente comunidades semus gherrende pro chi non sigant a tancare. In Tiesi b’at possibilidade chi no abèrgiant una prima classe de su Tècnicu. Ma repito chi su covid nos est nênde chi nùmeros minores podent contare prus de sos mannos. E classes de iscola cun pagos pitzinnos podent èssere una solutzione. Si aiant abertu sas iscolas chi ant tancadu in custos annos no aìamus àpidu nemmancu sos postales prenos».
Sole e bentu. De palas èolicas bos nche nde cheriant pònnere in Pèlau, carchi annu a como. Aìais naradu chi nono.
«Cussa fiat ispeculatzione energètica e non bincheit. Est s’idea de su profetu de sa gente nostra chi binchet. Tando, comente Comuna, l’aìamus iscritu finamentas in su Puc chi non nde cherìamus de cussas palas. Como una l’amus a pònnere nois in bidda, ma est un’àtera istòria, e nch’at a èssere in intro de sa comunidade energètica».
Tue rapresentas puru s’Unione de su Meilogu, beru? A Boruta ebbia ses pensende?
«Nono ca su progetu si diat pòdere replicare. Tzertu, in biddas prus mannas comente Tiesi, Bonorva e Putumajore bi diat àere carchi dificultade de prus. Ma su venidore est birde. Bi resessint in Goteborg, bi la podimus fàghere fintzas nois».
Non lasciare decidere l'algoritmo:
scegli La Nuova Sardegna per le tue notizie su Google
