La Nuova Sardegna

Antonella Era, 40 annos, de Tàtari. Posca de annos colados a traballare in àmbitu cummertziale a sas dipendèntzias, at sighidu su disìgiu suo de pitzinnia. Oe bivet sa bellesa d’èssere una professionista, Make up artist autònoma.

Antonella sa “Make up artist”, chie est?

«In antis de totu est un’artista chi tenet un’istima funguda pro sa creatividade e sa fantasia».

A manera ispetzìfica tue ite tratas?

«Su trucu pro cale si siat eventu, mescamente sos cojos. Trato isfiladas, ispetàculos de teatru, festas de carrasegare. In prus de su Make up mi so ispetzialigiada in Face painting, Body painting, Belly painting e finas fatzo Face painting pro pitzinnos aunidu cun s’animatzione in sos cojos e in sas festas. Ordìngio finas cursos de Self make up».

Su Belly painting, una novidade. It’est?

«Est su trucu pro sas fèminas ràidas mannas de sete o oto meses. Si pintat sa bentre cando est prus bene formada. Fatzo disinnos colorados artìsticos sighende sos disìgios ch’agradant a custas mamas. Custa est una faina a banda dae sas àteras, un’emotzione diversa e dìliga».

Su Make up est diversu dae su Face painting?

«Tzertu. Trucos, pingellos, tècnica, pro ambos duos sunt diversos. Su Face painting mi lu pedint pro eventos ispetzìficos comente sas festas a tema, isfiladas, a bias pro batijare aberturas de atividades. Est unu trucu ue b’at prus decoraduras, colores carcos, disinnos chi sighint su tema e si faghet finas paris cun su make up».

Pro su mundu de su Make up custa istima tua gosi manna dae ue est cumentzada?

«Si bi penso mi benit a conca chi deo, cando fia pitzoca, miraia cun ispantu mannu a una tzia mea mentres istaiat truchende·si. Custa tzia teniat petzi 10 annos prus de mene. Cando devia essire paris cun issa la bidia a s’ispissu imbellende·si cun aficu mannu. Deo li faghia milli preguntas subra de sos pingellos, subra de sos trucos, pro ischire a ite serbiant. Posca, dae giovanedda, m’agradaiat meda a mi trucare e a trucare sas amigas meas».

Pro custu mestieri istùdiu meda serbit?

«Emmo. Si cheres traballare a manera sèria cun grangeu pro tene e pro sos chi ti pedint custu servìtziu. S’istùdiat bastante. 5 annos a oe apo frecuentadu unu cursu de Face painting e apo cumpresu chi custu fiat su traballu giustu pro mene. Dereta apo chircadu un’acadèmia ispetzìfica. In Sardigna no est cosa simple a nd’agatare, ma su disìgiu fiat mannu!».

E in fines s’acadèmia agatada l’as?

«Eja, in Òlbia. Cun cuntentesa manna apo frecuentadu su master in s’acadèmia Work and Passion Lab chi m’at dadu possibilidades meda ca m’at formada in su totu. Su Make up s’annoat semper ca onni annu mudant colores, produtos e modas. Tando, onni mese, in s’acadèmia sigo sos cursos pro mi pònnere a die».

Cando tratas sas pessones dae ue cumentzas? E cun custas ite ligàmine b’at?

«Su trucu cumentzat cun s’anàlisi morfològica. Bido sa forma de sa cara ch’est importante pro su trucu curretore. Istùdio su tipu de pedde, su colore de pilos e de ogros. Pro su chi pertocat sos ligàmines, no est simple, bi cheret passèntzia e sensibilidade. Onni pessone at disìgios diversos e si praghet a manera diversa. Non totus resessint a s’abbaidare in s’ispigru cun serenidade. Faeddende meda cun sas clientes chirco de intèssere una relata de amistade e cunfiàntzia. Cussìgio ma finas iscurto sas preguntas e sas ideas e posca s’agatat sa cumbinatzione adata».

Cales sunt sas peleas prus mannas de custu traballu?

«B’at peleas meda, progetos, pensos e istùdios de ideas. S’impitat sa conca e su corpus. Si traballat a sa ritza pro oras. Meda bias mi nde peso a sas chimbe de mangianu pro sighire prus eventos paris. S’ischire meu s’illargat a sa fotografia cun su trucu fotogràficu. Naro chi custas cosas las bàjulas cando traballas cun praghere».

Mescamente ite t’agradat?

«Est importante meda su de mi pòdere ordingiare su traballu a sa sola. Mescamente m’agradat su chi mi torrat sa gente cun unu risu, cun paràulas de reconnoschèntzia, dae s’isposa a sa mere de domo, pro su traballu chi lis apo fatu. Cando isco ch’apo agiudadu a pintare de bellesa e majia su fitianu, unu coju o una festa, so cuntenta. Custu mestieri m’at leadu su coro».