Sambenados: una mustra de s’identidade de unu pòpulu
Finas sos sambenados sunt una mustra de s’identidade linguìstica de unu pòpulu. A bias, sunt cambiados dae s’istadu cunchistadore, a bias, sunt cambiados dae sas pessones matessi, pro si cunformare a...
1 MINUTI DI LETTURA
Finas sos sambenados sunt una mustra de s’identidade linguìstica de unu pòpulu. A bias, sunt cambiados dae s’istadu cunchistadore, a bias, sunt cambiados dae sas pessones matessi, pro si cunformare a sonos de sa limba dominadora. Unu de custos est istadu su sonu chi definimus “retroflessu”, otentu pinnighende sa punta de sa limba a dae segus, chirru a su paladu, e chi sinnamus cun -dd-, sacrificadu pro sa -ll-, es.: dae Cadeddu a Cadello, dae Cubeddu a Cubello, dae Tzidda a Cilla, dae Sedda a Sella, dae Tzoncheddu a Zonchello, etc.” Ma bastat finas una -u finale pro pilisare cumplessos, apaghiados cun su càmbiu in -o, a s’italiana, es.: dae Cadau (giustu!) a Cadao (italianizadu!), dae Cabigiosu a Cabigioso, etc.! In prus, sos sambenados chi agabbant in -i o -is sunt iscritos cunforma a sa pronùntzia meridionale de sa -e, es.: Leone>Leoni; Carbone >Carboni. Non sunt plurales italianos! Su -tg- a sa catalana currispondet a una -g- de sa norma de oe: Catgiu>Càgiu Su -que- a sa castigliana currispondet a sa -che- de oe: Porqueddu>Porcheddu, Sequi>Sechi, Piquereddu> Pichereddu, etc. Su -tz- de orìgine castigliana currispondet a su -tz- de oe: Atzori, Atzeni, Petza, Putzu, etc. Su lege 482/99 de sa Repùblica italiana cunsentit de cambiare su sambenadu, si sa pessone decrarat chi bi l’ant istropiadu. Bastat a presentare una dimanda a su sìndigu! (diegu corràine)
